Aarebötlä
Um üs im Summer nach de aastrengende Turnfest ds erhole, simer amne sunnige und heisse Samstig go Aarebötlä. Unger fachkundiger Aleitig vo üsem Kapitän, simer aui wieder heil und bruunbrönt ds Bern aacho & si üs sicher gsi, dass das es Erlebnis isch gsi wo mr im 2019 müesste wiederhole!
Biel
Seeländischs Turnfest in Biel. Anders aus gwohnt, aber trotzdem toll.
Chinderglück
I de letschte 5 Jahr si um di 11 Turnverein Babys uf d Wält cho. Mir si scho gspannt, wie viel im 2019 derzue wärde cho! 😉
Drunger und drüber
Was aus Spass hett agfange, isch hüt eh Tradition. Ds TVA Notetippspiel. Nach abgschlossnigem Wettkampf geit ds tippe los, us jeder Ecke vom Wettkampfgländ chunnt eh Nachricht i TVA WhatsApp Chat. Da geits drunger und drüber!
Eidgenössischs Turnfest
Im 2019 steit einisch meh es Eidgenössischs Turnfest aa. Mir fröie üs über öi Unterstützig in Aarau!
Füf mau
D Jugi hett am Seeländische Jugitag 2018 zum füfte mau in Folg dr 1. Rang ir 2. Stärkeklass erreicht!
Härzlechi Gratulation!
Grätkombi
Im 2019 wärde mr mitere Grätkombi a Start gah, für die Meiste vo üs Neuland, doch mi darf gspannt si!
Hamburgertoufi
Ds Highlight vo jedem Skiweekend. Verrate drüber wei mr nüt, nume so viel: Wenn Froue u Manne liecht bechleidet düre Schnee hüpfe, de stuune no die hartgsottne Hüttebsitzer!
Idee
Ideene hei mr viu und versueche so viel wie möglech um ds setze. Und wenns für Turnfest nid längt, steit ja de no eh Turnvorstellig aa, wome d’Ideene cha verpacke. 🙂
Jugimeeting
Wi jedes Jahr eh volle Erfolg! Was am späte Aabe no ir Boumbar passiert, berchöme nume die mit, wo ou bis ds Letscht blibe!
Kapitän
Dr Organisator u Kapitän vom Aarebötlä isch im 2018 zum heimleche Star worde. Üsi Unachtsamkeit mit dä grösste und schärfste Steine hetter üs immer no nid verzeiht! 😉
Leiterteam
Ke Riege ohni Leiterteam, wo Trainings plant und dürefüehrt, Administrativs erledigt und sech witerbilde, ungerstützt und hiuft, sowie motiviert und tröstet.
Dir sit di Beste!
Motivation
Üsi Oberturner si mit üsere Turnmotivation im 2018 mengisch meh, mengisch weniger zfride gsi
Dr Turnverein Vorsatz fürs nöie Jahr isch, (fast) jedes Training vo öich cho ds bsueche, versproche!
Null Siibe Nün hett si gseit
Ds Kultlied im 2018 hett ou bi üs Izug ghaute u so trällert dr eint oder dr ander vor säch häre oder versuecht dermit d Handynummer vore hübsche Turnerin use ds bercho…
Versuechets doch ou mau, si cha nid meh säge aus „079 hett si gseit…“ 😉
OT’s
Üsi Oberturner hei ke Angst vor Nöiem, so hei si sech immer wieder tolli Sache überleit, wo mr so no nie gmacht hei. Mir si gspannt, was dr nech fürs 2019 löht lah iifaue!
Packe
Jedes Jahr ds Gliche;
Gymnastikchleider, Barredress, Turnschueh, Naguschueh, Vereinsshirt, längi Hose, churzi Hose, Flip Flops, Jäggli, Sunnebrüue, STV-Uswiis – Aues derbi?
Qualität
Dr Turnverein Ammerzwil macht keni haube Sache, darum fiele und bearbeite mir üsi Programm, Turnvorstellige, Aaläss bis mr zu 101% zfride si. Für üs herti Arbeit, für üsi Zueschouer und Gäst hoffentlech eh Fröid!
Reise
Näbst em Turne düe mr ou sehr garn reise, so simer im letschte Jahr uf Luzern, Basel, Engstligenalp u is Seetal greist.
Seetal
Turnfest im sympatische Luzern, mit toller Stimmig und für einisch mau eh Übernachtig ir Turnhalle.
Seetal, zu dir chöme mir gärn mau wieder!
Turnverein Rapperswil
D Hassliebi isch allgemein bekannt u jedes Jahr am Turnfest di glichi Frag „Wär hett di höcheri Note?“. Im 2018 heimer di Frag schnäu klärt gha, so heimer mit Rapperswil dörfe dr 7. Platz u di glichi Note teile. Happy End!
Uffahrt
Uffahrtsreisli mitem Gsamtverein. Spiele, Rede, Lache, Ässe und Trinke.. Was wosch no meh?
Vorstand goes modern und grüen
Dr Papierchrieg mit Iladige, Protokoll und Informatione isch riisig. Um das iidsgränze wärde Informatione per WhatsApp versendet, Iladige zu Vorstandssitzige wärde ebefaus im WhatsApp versändet u d Protokoll wärde elektronisch verschickt.
Bis itz isch no jede dert gsi woner hätt söue 😉
Wätterglück
Strahlende Sunneschiin bim Aarebötlä, Schnee im Skiweekend, Chüuhs Windli am Turnfest, ds Wätterglück isch im 2018 uf üsere Site gsi. Einzig dr Räge uf dr Turnerreis passt irgendwie nid zu dem Glück!
X-Mau
Füre Erfolg heissts X-Mau trainiere und fiele. Ds wird ou i däm Jahr so si & so heissts einisch meh: „Mir maches nomau.“
Yes we can!
Mit dr Ungerstützig vo aune TVA Mitglieder wird ou ds Jahr 2019 wieder es Jahr voller schöner und erfolgrichne Momente. Yes we can!
Zum Schluss
Zum Schluss möchte mr üs bi aune Leiter, Helfer, Fans, Ungerstützer, Supporter und aui Andere wo öbis für üs mache bedanke und wünsche öich es erfolgrichs 2019!
Füre Turnverein Ammerzwil-Weingarten
Milena Brauen
Denise Roth