Jugimeeting Ammerzwil – Weingarten 2018
Wi aui Jahr träffe sich üsi Jugeler am Morge am 8i hinger üsem Garage ds Ammerzwil für üse Heimwettkampf. Ou es paar ganz nöi Gsichter hei sich unger di bekannte Jugeler gmischet. Mit viu Motivation und Energie si si scho gah iloufe. Und de isches los gange … aber aus auerersts no ds wichtigste, Zämähäbä uf neh guede und erfougriche Wettkampf. Gmeinsam startet di ganz Jugi vo chli bis gross mitem 60 Meter, für di Äutischte 80 Meter Sprint. Ahschliessend geids i de verschiednige Gruppe witer mit Wiitsprung, Ballwitwurf / Kugelstosse und ab dr 4.Klass no dr 800 Meter Louf. Leider hets scho während em Wettkampf es paar Unfäll gäh, zum Glück aber haub so Schlimm und aui hei no säuber chönne loufe. Am 13.00h hei ou di letschte Ammerzwiler chönne dr Wettkampf erfougrich und erschöpft beende (het sicher ou am heisse Wätter glägä 🙂 ) und hei sich d Mittagspouse richlech verdient und hei chönne nöi Chraft und Energie tanke für ds Namitagsprogramm. Es währde wieder nöi Gruppe gmacht für üses autbekannte Namitagsprogramm: Pendustaffete und Seilizieh. Nach em neh churze iwärme und Taktik bespröchig geits los mit de Pendustaffetevorlöuf. Und üsi Jugeler hei aues gäh um witers cho. Und ds isch ihne ou nid schlecht glunge. Nid nume, ds aui Teams witercho si sonder eis Team isch i ihrer Kategorie sogar die auerschneuschte gsi. Und ou im Seilizieh hei si aues gäh. Bi tene isches ganz schneu fertig gsi und bi anderene isches bis i ds Finau gange. Ou im Seilizieh hei mir es Team gha wo am Stärkste isch gsi und gwunne het.
Nach de Pendustaffete und nachem Seilizieh het d Rangverkündigung gfougt. Und üsi Jugeler si dr Hammer gsi: 9 Goudkrüzli uszeichnige, 4 Bronze Medaille, 8 Silber Medaille und 5 Gold Medaille.
Mir gratuliere zu dene Super Leistige und ou jedem Einzelne Jugeler füre Isatz am Jugimeeting – Mir si eifach Hammerzwil 🙂 !
Milena Brauen, Jugileiterin