Zum Abschluss vo üsere Summersaison hett üse Vizeoberturner es Aareböötlä organisiert. So isch üse Kapitän Lukas mit 11 wiitere muetige Matrosinne und Matrose i See bzw. id Aare gstoche.

Mir hei üs eh wunderschöne und heisse Tag usgsuecht u de heimer schneu müesse feststelle, dass mir nid di Einzige mit dere Idee gsi si, so heimer prompt üse Zug verpasst. Eh halb Stund später simer de doch no ds Thun aacho u hei scho gli chöne iiwassere.

Üsi Jüngste Matrose si mit Ihrne Matrose-Eltere am schnäuste ungerwägs gsi und so hei sech üsi drüü Boot schneu use de Ouge verlore. Gli simer zur berüehmt-berüchtigte Uttiger Schwelle cho, dank üsem erfahrnige Kapitän heimer aber ou die meh oder weniger elegant gmeisteret.

Üsi drüü Böötli hei wohl scho di einti oder anderi Alterserschiinig gha, jedefaus hei si immer wi meh Luft verlore u d Böötli hei sech immer wi meh mit Wasser gfüut. Turner hocke bekannterwiis nie ufem Trochne, aber so heimer üs ds de ou nid vorgsteut! So isches cho, dass mr ufemne provisorische Halteplatz hei usgwasseret, um üsi Boot nöi mit Luft ds befüue. A de Reaktione vo de andere Böötler aa, isch ds eue eigentlich nid so regukonform.

Sobald d Boot wieder startklar si gsi, heimer chöne witer schippere u de simer gmüetlech dahii plätscheret.

Nachemne churze aber gmüetleche Zmittag/Zvieri Halt heimer de üsi Böötli zemebunde, dass mr dr Räst vor Fahrt no gmeinsam hei chöne gniesse. Ei Matros hett sech wohler im aus ufem Wasser gfüuht, so isch dä ohni Böötli uf Bern abegschwumme 🙂 Sicher und kompetent hett üs üse Kapitän id Regle und Gheimtipps vom Böötle iigweiht, darum heimer ihm dr Sprung id Aare natürlech gern gönnt. So hetts müesse cho, dass mr mitem Kapitän im Schlepptou über di Grösste und Schärfste Steine grütscht si. Sorry Kapitän für das!

Mit paar chline Schürfige uf Mann und Boot simer de ou scho id Nöchi vo Bern cho. No es paar letschti Instruktione vom Profi u de si aui de ou heil und sicher am Ufer wieder aacho. Nei stopp, da isch ja no öbis! Üses blaue Fass hett sech bim Uswassere leider verabschidet, blöd nur we sech dert Huus,- Outoschlüssle und Portemonnaies drin befinde! Nachere Rettigsaktion vo üsne Wärtsache heimer üs ufe Wäg zrüg id Heimat gmacht.

Mit drüü Stund Verspätig, aber glücklech und bruunt-brönnt simer nachemne lustige Tag wieder däheime aacho.

Merci Kapitän Lukas fürs Organisiere, äs hett gfägt! 🙂